Amargi produksi listrik turah ambrah-ambrah, Walandi taun 2020 wingi saget ngèkspor listrik ngantos 22,4 milyar KWh.
Produksi listrik ing Walandi saking sumber lestari: srengèngè, toyá, angin lan biomassa taun 2020 wingi mlesat 9,2 milyar KWh utawi mindhak 40%, makaten Centraal Bureau voor de Statistiek (CBS), biro pusat statistikipun Walandi, dinten sapuniká, Kemis (4/2).
Kesaguhan Walandi ngolah listrik saking sumber srengèngè lan angin sangsáyá inggil antawisipun kanthi damel windpark wonten ing laut, tegesipun ing wilayah laut ingkang jembar dipunceblokaken kitiran angin-kitiran angin kanggé sumber listrik ugi damel papan-papan kanggé sumber listrik srengèngè utawi suryá.
Sawetárá produksi listrik saking sumber areng batubara sangsáyá kirang, mandhap kathahipun 9,7 milyar KWh. Puniká ngirangi separuhipun dipunbandhingaken kalih taun 2019.
Sebagèan sumber listrik sanèsipun ing Walandi dipun pundhut saking gas bumi, amargi bumi Walandi nggadhahi sumber-sumber gas ingkang dipundadosaken sumber listrik. Produksi listrik saking sumber gas bumi taun 2020 kálá wingi mindhak 1,7 milyar KWh ngantos totalipun 70,8 milyar KWh.
Amargi produksi listrik saking gas bumi dipun tambah saking sumber lestari srengèngè, toyá, angin lan biomassa turah ambrah-ambrah pramilá Walandi taun 2020 wingi saget ngèkspor listrik ngantos 22,4 milyar KWh. Puniká ongká total èskpor listrik paling kathah dipunukur saking taun 1976.
Éwodéné impor listrik Walandi mandhap 0,6 milyar KWh ngantos 19,8 milyar KWh. Kanthi makaten wonten saldo èkspor kathahipun 2,7 milyar KWh. Walandi wiwitanipun kalebet importir-netto listrik. Paling pungkasan Walandi naté saget langkung kathah ngèkspor listrik tinimbang ngimpor taun 1981 kanthi saldo 97 juta KWh. (es)