DEN HAAG – Wiwit 26 Januari 2022 pamréntah Walandi resmi pungkasi lockdown. Rèstoran, café, sáhá kabudayan kénging bika malih dugi jam 22.00.
Makaten ugi bonbin, musea, casino, taman-taman bebingahan, lan tanding olahrágá saget dipunwiwiti malih kaliyan pamirsá ing stadion. Nanging wonten pundi mawon taksih wajib jagi let 1,5 meter, ugi wajib nganggé masker ing dalem gedhong. Kanggé rèstoran, café, lan kabudayan kartu Corona wajib tumrap sinten mawon wiwit yuswá 13 taun.
“Mawi palonggaran pranatan Corona puniká kabinèt njarag madosi wates-wates ingkang saget dipuntindakeken,” makaten PM Mark Rutte naliká maringi konferènsi pers dinten Selásá (25/1/2022) dalu.
Pranatan énggal puniká badhé dipuntrapaken dangunipun 6 minggu. Mangké tanggal 8 Maret 2022 kabinèt badhé netepaken malih punápá saget langkung dipunlonggaraken malih. Dinten Rebo 9 Maret periode énggal puniká badhé pungkasan. Tigang minggu malih badhé dipunsusul wekdal kanggé nimbang-nimbang.
Miturut PM Rutte, kabinèt nindakaken kados makaten amargi ing wingkingipun sedáyá sesambat lan unjuk raos ingkang saget dipunmangertosi wonten pantheng-panthengan lan masalah ingkang ageng.
“Kirang langkung tigang minggu malih dados wekdal antawis kanggé nimbang-nimbang,” makaten PM Rutte.