DEN HAAG – Kabinet demisioner paring wárá-wárá malih babagan pangowahan beleid Corona, Selásá kapungkur.
Beleid énggal puniká antawisipun ngemu pranatan bilih párá kawulá boten wajib malih njagi let 1,5 meter, nanging menawi tindak mlebet café kedah mbetá Coronapas (kartu Corona, red) ingkang nedhahaken bilih piyambakipun sampun pikantuk suntik vaksin.
Salajengipun ikhtisar beleid énggal makaten:
Boten Wajib 1,5 Meter
Pranatan wajib njagi let 1,5 meter wiwit tanggal 25 September 2021 dipuncabut. Kabinet ngetrapaken pranatan puniká 1,5 taun kapungkur minongká ‘normal énggal’ wanci pagebluk Corona utawi Covid-19. Pungkasan aturan 1,5 meter puniká dados simbol jangkah ageng saking pamréntah. Senaosá boten wajib malih, pemerintah wanti-wanti kanthi sanget tetep njagi let 1,5 meter.
Wajib Bukti Vaksin
Wiwit 25 September 2021 párá kawulá wajib nedhahaken Coronapas inggih puniká kartu bukti sampun pikantuk vaksin menawi badhé mlebet hotèl, restoran, café, séktor seni lan kabudhayan sáhá pratandhingan olahrágá. Coronapas puniká ngemu katerangan vaksinasi, nembé saras saking Covid-19, utawi tès PCR négatif. Coronapas wajib tumrap sedáyá kawulá wiwit yuswá 13 taun.
Kénging Fèstival Malih
Fèstival utawi hajatan ramé-ramé dipunidini malih, kalebet acara sedinten utawi pinten-pinten dinten, kados paméran, éxpo, konsèr musik, lan sapanunggalanipun. Syaratipun inggih puniká párá rawuh saben 24 jam kedah nedhahaken Coronapas. Jumlah párá rawuh utawi pengunjung boten dipunwatesi ugi boten wonten jam wajib tutup kados café. Acara makaten ing café, diskoték lan nightclub kedah tutup tengah dalu.
Sekolah
Menawi ing satunggaling kelas wonten siswá positif Covid-19, miturut aturan sapuniká kelas kedah dipunbibaraken lan sedáyá siswá kedah karantina mandiri ing griyá. Wiwit tanggal 20 September 2021 boten makaten malih. Kelas tetep jalan, lajeng dipunpirsani sinten ingkang srawungan raket kalih siswá ingkang positif Covid-19 wau. Senaosá makaten kantor GGD (Dinkes) saget maringi advis mbibaraken kelas menawi kathah ingkang positif Covid-19.
Boten Wajib Masker
Kelas sekolah madyá dugi universitas boten wajib malih nganggé masker. Nanging pranatan nganggé masker taksih wajib menawi nitih bis, karétá, utawi montormabur (pesawat), semanten ugi menawi mlebet bandara, utaminipun menawi sampun nglangkungi duane.
Boten Karantina
Sinten ingkang késahan sampun pikantuk vaksin jangkep wiwit tanggal 22 September 2021 boten usah karantina malih, senaosá saking negari-negari risiko inggil.