DEN HAAG – Pemilu Karajan Walandi sampun kalampahan tanggal 21 Maret 2021, nanging prosès formasi kabinèt antawis partai VVD ingkang menang pemilu, D66, CDA lan CU, dugi dinten sapuniká taksih alot. Sampun 9 sasi saking pemilu utawi 10 sasi sasampunipun kabinet bibar, demisionèr, taksih dèrèng wonten kabinet.
Lajeng kabar formasi kabinèt salajengipun pripun? RTL Nieuws mireng ‘suanten-suanten positif’ babagan prosès formasi wau. Kadosipun minggu ngajeng párá pangarsá partai sampun saget sarujuk perkawis prajanjian koalisi, makaten sumber anyariosaken dateng RTL Nieuws.
Sadèrèngipun informatur Wouter Koolmees dinten Senèn ugi sampun optimis (‘Temponipun rembugan formasi inggil sanget, lancar’), makaten ugi pangarsá partai Christen Unie Gert-Jan Segers (’Kalancaran kados makaten 4 taun kapungkur kulá dèrèng naté ngalami’).
Nanging liniwekdal, ingkang dipuntangklek déning pangarsá parlemèn Vera Bergkamp boten wonten, kadosipun nembé saget dipunaturaken menawi sampun wonten prajanjian koalisi, makaten párá informatur.
Anggota parlemèn Pieter Omtzigt kálá wingi sampun ndhesek, nanging boten pikantuk meerderheid (suanten mayoritas), partai-partai koalisi kabinèt ingkang sapuniká demisionèr boten ndukung.
Sadèrèngipun minggu kapungkur NRC ugi sampun nyerat bilih párá juru rundhing sampun sami karsá maringi konsèsi, ugi nami-nami párá menteri ingkang bakal lenggah ing kabinèt sampun langkung cethá, antawisipun Hugo de Jonge (sapuniká Menteri Keséhatan) kadosipun bakal kadhapuk mlebet kabinèt malih. Lajeng Wopke Hoekstra (pangarsá partai CDA), koordinator pananggulangan terorisme Pieter Jaap Aalbersberg (CU), Esther de Lange (anggota parlemen Eropa, CDA).
Puniká wau nggambaraken bilih formasi sampun radi saget dipunnormalaken. Nanging bahan-bahan konflik taksih cekap kathah. Saking kasilipun pemilu Maret kapungkur cethá sanget bilih pemilih ngarsaaken Walandi ‘tengen’, nanging kahanan ékonomi sosial lan finansial nggèsèr parlemèn malah ‘ngiwá’.
Dados kanggé párá juru rundhing sedáyá wau saget ndorong blánjá anggaran mangké dipunsèndèraken dateng perusahaan arupi pajek bathi ingkang inggil, lan sapanunggalanipun. Kanggé partai VVD minongká partai párá juragan ingkang menang pemilu kadosipun angèl saget nampi.
Formatur Johan Remkes (VVD) minggu kapungkur sampun ndamel dobrakan, ingkang nyingkiraken ganjelan D66 supados saget nampi ChristenUnie mlebet kabinèt. Éwodènten formatur satunggalipun, Wouter Koolmees (Menteri Sosial demisionèr, D66), sadèrèngipun sampun dados verkenner (juru njajag) sasampunipun Annemarie Jorritsma (VVD) sáhá Kajsa Ollongren (D66) minongká juru njajag milih mundur. Wekdal semanten Koolmees lenggah dados juru njajag kabinèt sareng kaliyan Tamara van Ark (VVD). Sapuniká Van Ark ugi mundur kanthi alesan kaséhatan.