DE BILT – Saking kuthá De Bilt wau dalu Jemuah malem Setu ing mongsá herfst (Mongsá Gugur) puniká kaping sepindhah suhu mandhap dugi -0,9° Celsius kaukur 10 cm saking siti.
Kanthi makaten tegesipun wanci bediding ing Mongsá Gugur, inggih puniká wanci adhem anyes sampun dados kasunyatan, makaten weer.nl mbabaraken dinten Setu (24/10).
Nanging senaosá makaten miturut weer.nl dèrèng ngantos mlebet wanci bediding sawilayah tanah Walandi. Supados saget kasebat makaten kedah sirep adhem dugi saandhaping 0° Celsius kaukur 1,5 meter saking siti (lemah).
Sadèrèngipun ing dalu tanggal 15 malem 16 Oktober sasi puniká ugi sampun kedadosan suhu mandhap dugi -0,5° Celsius ing Twente lan -0,6° Celsius ing Noord-Limburg.
Dalu-dalu samangké dipunprakiraaken suhu bakal mandhap malih dugi saandhaping titik 0° Celsius. Éwodènten wanci siangipun kados dinten Setu puniká suhu paling inggil 12° Celsius, lajeng dinten Ngahad srengèngè bakal ketingal saénggá suhu dugi 14° Celsius.