DEN HAAG – Mawi kabijakan pamréntah sapuniká wargi Walandi sampun ngirangi dhahar sarem lan gendhis, senaosá makaten taksih saget ambisius malih.
Saben dinten wargi diwásá Walandi rátá-rátá ngirangi sarem 0,5 gram utaminipun saking roti, daging, kéju, lan sup, lan ngirangi gendhis 7,5 gram (èkuivalèn 30 kalori) utaminipun saking softdrink lan produk susu.
Puniká wau akibat langsung saking prajanjian antawis Het Ministerie van Volksgezondheid, Welzijn en Sport (Kamentrian Keséhatan, Kasejahteraan lan Olahrágá) kalih industri pangan ing taun 2014, ingkang ngemu tujuan kanggé njamin párá kawulá Walandi langkung sakedhik pikantuk sarem lan gendhis mawi dhaharan lan unjukanipun.
Senaosá makaten, miturut Rijksinstituut voor Volksgezondheid en Milieu/RIVM (Lembaga Nasional Keséhatan lan Lingkungan) ongká asupan sarem wargi taksih kalebet inggil inggih puniká rátá-rátá 8,7 gram per dinten (norma séhatipun 6 gram sarem per dinten), lajeng gendhis 114 gram gendhis per dinten (norma séhatipun 25 gram gendhis per dinten).
RIVM sampun bolan-balèn nindakaken panelitian kanggé ngukur kasilipun prajanjian kalih industri pangan wau, presisipun Akkoord Verbetering Productsamenstelling (Prajanjian Ngowahi Bahan-bahan Produk Pangan). Saking panelitian paling énggal, jebul pabrikan pangan sampun nindakaken ngirangi sarem lan gendhis ing produk panganipun, nanging konsumèn taksih tetep kathah pikantuk sarem lan gendhis mlebet badanipun.
Sajanipun saget langkung dipunkirangi malih manawi dipundamel prajanjian-prajanjian ingkang langkung ambisius tumrap produk-produk pangan. Bahan-bahan produk pangan ingkang langkung séhat puniká salah satunggaling cárá kanggé dhahar langkung séhat.
Kajawi makaten damel lan dhahar pilihan-pilihan séhat miturut 4 séhat 5 sampurná ugi wigatos. Milih produk ingkang paling sakedhik ngandhut sarem, gendhis, lan lemak jenuh puniká jangkah paling wigatos tinuju pola dhahar ingkang langkung séhat. Titi nastiti ningali ètikèt pangan ugi saget mbiyantu sanget (es/es).