PEKALONGAN – Wilhelmina-Park (Taman Wilhelmina) jaman Walandi kanggé panggènan lomba olahraga. Wilhelmina inggih puniká Ratu Walandi éyang buyutipun Rájá Willem-Alexander ingkang jumeneng sapuniká.
Sasampunipun mardhiká Wilhelmina-Park, presisipun kalenggahan ing práliman kuthá Pekalongan, dados Taman Bintang Kecil, lajeng THR, sapuniká sampun telas dados pertokoan, kantun sekedhik kanggé Monumèn Juang.
Wanci énjing, tim-tim siswá MULO sáhá párá guru sampun nyiapaken lapangan kanggé tandhing mangké siang. Taman Wilhelmina sampun ramé éndah mawi gendérá lan umbul-umbul, ingkang dipunpasang ing pinggir margi lan wit-witan.
Lomba Olympische-Oranje-Estafette ingkang ndaftar wonten 10 tim nanging ingkang ndèrèk namung 5 tim, inggih puniká 2 tim saking MULO, 1 tim Chineesche school (sekolah Ciná/HCS), 1 tim Arabische school (sekolah Arab/Al Irsyad), lan 1 tim PGL. Ingkang juara MULO lan Al Irsyad.
Lajeng Passar Ratoe Estafette, ndèrèk lomba puniká siswá-siswá putrá Europeesche Lagere School (ELS), Hollandsch-Chineesche School (HCS), HCS II, lan Hollandsch-Inlandsche School. Ingkang juara dugi garis pungkasan inggih puniká HCS.
Éwodènten ingkang ndèrèk lomba Passar Ratoe Estafette kelompok putri ingkang puniká ELS, HIS, HCS II sáhá Kartini School. Ingkang juara ELS.
Salajengipun Hindernis-Estafette (Halang Rintang) putrá: ELS, HCS I lan II, HIS, Katholieke Lagere School (KLS), ingkang juara HCS II. Kelompok putri: ELS, HIS, lan Zusterschool (Sekolah Suster), ingkang juara HIS.
Ingkang pungkasan lomba Duurloop (Maraton) ingkang ndèrèk cacahipun wonten 25. Lomba puniká anyediani 5 hadiah. Juaranipun miturut urutan: Fatkoerachman (PGL) ingkang mlajar rátá-rátá 12 km/jam, Abdoelah Talib, Tiono, Soejono lan Rochani.
Tim-tim sekolah lan individu (piyambak) ingkang juara dipunkempalaken ing garis finis, ing mriku asistent-resident ngaturaken pidato lan maringi hadiah.